საერთაშორისო მუსიკალური ფესტივალი „ღამის სერენადები“

პროექტი აჭარის კულტურის სამინისტროს ფესტივალების საგრანტო კონკურსის გამარჯვებულია და მიზნად ისახავს კლასიკური მუსიკის პოპულარიზაციას, ახალგაზრდა ქართველი მუსიკოსების პროფესიულ განვითარებას, ქართველი და უცხოელი არტისტების თანამშრომლობის გაღრმავებას.

 

ფესტივალის პროგრამა აერთიანებს როგორც საკონცერტო, ასევე საგანმანათლებლო და სხვა კულტურულ აქტივობებს.

 

ბათუმში, 23–25 აგვისტოს, გაიმართება კონცერტები, ასევე, მხატვარ მანანა გეგიძის ნამუშევრების გამოფენა, 27 აგვისტოს რევაზ ლაღიძის სახელობის სამუსიკო სკოლაში მოეწყობა ლიანა ისაკაძის 80 წლის იუბილესადმი მიძღვნილი წიგნის - „მუსიკის ზეიმი“ - პრეზენტაცია.

 

ბათუმში, ფესტივალის ოფიციალურ გახსნამდე პრესკონფერენცია გაიმართა, რომელშიც მონაწილეობდნენ აჭარის კულტურის სამინისტროსა და ბათუმის მერიის წარმომადგენლები, ფესტივალის ხელმძღვანელები და მოწვეული არტისტები.

 

წლევანდელი ფესტივალი ლეგენდარული ქართველი მევიოლინისა და დირიჟორის, ლიანა ისაკაძის, დაბადებიდან 80 წლის იუბილეს ეძღვნება.